Hepardlar və impalanı göstərən bir foto sosial mediada geniş şəkildə paylaşılıb. Foto ilə bağlı paylaşılan məlumatda, fotonun müəllifinin bu fotoya görə mükafat qazandığı, lakin sonra depresiyaya düşdüyü iddia olunur. İddiaya əsasən, fotodakı impala, balasını xilas etmək üçün özünü hepardlara təslim edir.
Fotonun hekayəsi realda fərqlidir
İddia fotosunu axtarış motorunda əks axtarış üsulu ilə araşdırdıqda bir çox məqaləyə rast gəlirik. Açar sözlərlə axtarış davam etdikdə, fotonun 2013-cü ildə Keniyada, Alison Buttigieg adlı fotoqraf tərəfindən çəkildiyini görmək mümkündür. Buttigieg, şəxsi veb saytında həm fotoları həm də fotonun hekayəsini paylaşıb. Buradakı açıqlamanı oxuyanda görürük ki, foto ilə bağlı yayılan iddia doğru deyil. Fotoqraf 2013-cü ildə, Keniyada, balalarına ovunu necə öldürməyi öyrədən hepardları və onların ovu olan impalanı görüntüləyib. Fotoda ağzı impalanın boynunda olan ana heparddır. Buttigieg, ana hepardın balalarına öyrətməyə çalışsa da bala hepardların impalanı öldürə bilmədiyini müşahidə etdiyini yazır. Sonrakı fotolarda ana hepardın ovunu öldürdüyünü görmək mümkündür.
Foto ilə bağlı paylaşılan yanlış hekayə xarici dillərdə də yayılıb. İddia ilə bağlı açıqlama verən fotoqraf, depresiyaya düşmədiyini və paylaşılan iddianın həqiqəti əks etdirmədiyini bildirib.
“The Stranglehold” adlı foto 2016-ci il Siena Fotoqrafiya Mükafatlarında “Remarkable Artwork” kateqoriyasına seçilən fotolar arasında yer alıb.
Daha əvvəl iddia AFP, Full Fact kimi bir çox fakt yoxlama quruluşu tərəfindən araşdırılıb və yanlış olduğu ortaya qoyulub.
