Bir video sosial şəbəkədə Tovuzun Ağdam kəndində gedən döyüşləri əks etdirdiyi iddiası ilə paylaşıldı. Bu video Instagram-da 92 min dəfədən çox izlənildi.
Lakin iddia doğru deyil. Video 3 iyul 2020 tarixində Türkiyənin Sakarya vilayətində fişəng fabrikində baş verən partlayışdandır.
Video cəbhə xəttindəki qarşıdurmaya aid deyil
Azərbaycan cəbhə xəttinin Tovuz istiqamətində gedən döyüşlə əlaqəsi olduğu iddia edilən video iddiası həqiqəti əks etdirmir. Videodakı kadrlardan birini əks axtarış üsulu ilə Google, Yandex kimi axtarış motorlarında axtardığımız zaman bu videonun Türkiyənin Sakarya vilayətindən olduğuna dair xəbərlər və ya ən azından Tovuz istiqamətindəki döyüşlərdən əvvəl bir tarixdə paylaşıldığını görmək mümkündür.
3 iyul 2020 tarixində Türkiyənin Sakarya vilayətində fişəng istehsal edən fabrikdə partlayış baş verdi. Hendek rayonunda yerləşən fabrikdə ard-arda bir neçə partlayış oldu. Rəsmi açıqlamalara görə hadisə zamanı fabrikdə 186 nəfər olub, 100-dən çox şəxs yaralanıb və 7 nəfər vəfat edib. Hadisə baş verdikdən sonra partlamayan fişəngləri və digər partlayıcıları təmizlənməsi üçün daşıyan yük maşını partladı və üç işçi həyatını itirdi. Hadisə ilə bağlı başqa video görüntülərə də rast gəlmək mümkündür.
Nəticə etibarilə Tovuzun Ağdam kəndindəki vəziyyətlə bağlı olduğu iddia edilən video əslində başqa zamanda baş verən fərqli bir hadisəni əks etdirir. Bu iddiaya yanlış məlumatın yeddi növündən biri olan xətalı əlaqələndirmə demək mümkündür.
