Sosial şəbəkədə paylaşılan videonun Tovuz istiqamətindəki döyüşlərdən olduğu iddia edildi. Bu paylaşımlardan biri 154133 dəfə izlənilib.
Lakin iddia doğru deyil. Video Tovuz istiqamətindəki döyüşlərin başladığı tarixdən daha əvvəl YouTube-da yüklənib.
Video 2017-ci ildən YouTube-dadır
Azərbaycan və Ermənistan arasında Tovuz istiqamətində gedən döyüşlər 12 iyul 2020-ci ildə başladı. Həmin döyüşlərdən olduğu iddia edilən videodan görüntüləri axtardıqda videonun YouTube-a 2017-ci il 30 noyabr tarixində yükləndiyini görmək mümkündür.
Video türk istifadəçi tərəfindən “Türkiye Doçka Atışı” başlığı ilə paylaşılıb. Doçka (ДШК, Дегтярёва-Шпагина Крупнокалиберный”) Sovet tərəfindən hazırlanmış 12.7 mm-lik ağır pulemyotdur. Videoda Doçka atışını göstərdiyi iddia edilsə də videonun harada və nə zaman çəkildiyinə dair dəqiq məlumat yoxdur. Ancaq videoda türkcə danışıldığı anlaşılır. Videonun sürətini azaltdıqda 30-cu saniyədə “görüntü alabildin mi” kimi sözlər eşidilir.
Nəticə etibarilə videonun 12 iyul 2020-ci ildə başlayan Tovuz istiqamətindəki döyüşlərdən olduğu iddiası yanlışdır. Video bu döyüşlərdən əvvəl, 2017-ci il 30 noyabr tarixində YouTube-da yüklənib. İddiaya yanlış məlumatın yeddi növündən biri olan xətalı əlaqələndirmə deyə bilərik.
