Sosial mediada və xəbər saytlarında Ukrayna və Rusiya münaqişəsindən olduğu iddia edilən video, foto materiallar yayılmağa başlayıb. Bu videolardan birinin rus paraşütçülərin Ukraynanın Xarkov şəhərinə enməsini göstərdiyi iddia edilib.
Video 2016-cı ildən bəri paylaşılır
Videodan alınan ekran görüntülərini əks axtarış üsulu ilə Yandex-də axtardıqda, bənzər görüntlərin olduğu rusca paylaşımlara rast gəlirik. 2019-cu ildə video “Хахлы, Запомните, Именно Так Выглядят Российские Десантники” başlığı ilə paylaşılıb. Bu başlıq ilə axtarış etdikdə 2016-cı ildə paylaşılan başqa bir sosial media paylaşımına rast gəlirik.
Video ilə axtarışa davam etdikdə Facebook-da yenə 2016-cı ildə paylaşılmış videoya rast gəlirik.
Videonun açıqlama qismində 2014-cü ilə aid olduğu və Rusiya Hava-desant qüvvələrinin (VDV) Rostov şəhərinə enişini göstərdiyi iddia olunsa da açar sözlər ilə axtarış etdikdə bunu təsdiqləmək üçün kifayət qədər etibarlı mənbəyə rast gəlinmir.
Videonun dəqiq olaraq hardan olduğu təsdiqlənməsə də 2022-ci il Xarkova eniş edən paraşütçüləri göstərdiyi iddiası doğru deyil. Video 2022-ci ildə başlayan münaqişədən illər əvvəl 2016-cı illərdən bəri paylaşılır.
