Sosial şəbəkədə paylaşılan bir videonun Qarabağdan olduğu iddia edildi. Video mindən çox Facebook istifadəçisi tərəfindən paylaşıldı.
Lakin videonun Qarabağdan olduğu iddiası doğru deyil. Videodakı hərbi maşının üzərində Əfqanıstan xüsusi təyinatlı qüvvələrinə aid logo mövcuddur.
Videodakı hərbi maşın Əfqanıstan xüsusi təyinatlılarına aiddir
Videodan olan kadrları Google, Yandex və Bing kimi axtarış motorlarında əks axtarış üsulu ilə araşdırdıqda videonun başqa tarixlərdə paylaşılmış tam versiyalarını tapmaq mümkündür. Bu video həm 2019-cu ilin oktyabrında həm də 2020-ci ilin may ayında sosial şəbəkədə paylaşılıb. Videonun sosial şəbəkədə paylaşıldığı bu tarixlər, Azərbaycan və Ermənistan arasında 2020-ci il 12 iyul tarixində Tovuz istiqamətində başlayan döyüşlərdən daha köhnə tarix olduğunu göstərir.
Videonun tam versiyasına baxdığımız zaman ilk saniyədəki görüntülərdə olan hərbi maşının emblemi bizə bu videonun Qarabağdan olmadığına dair ipucu verir.
Ətraflı axtarış etdiyimiz zaman bu emblemin Əfqanıstan xüsusi təyinatlarına aid olduğunu görürük. Yəni videonun nə Azərbaycan nə də Ermənistan ilə bir əlaqəsi yoxdur.
Logoların olduğu fotolardan biri Wikimedia-ya istinadən, 2010-cu il may ayında çəkilib və Əfqanıstan Milli Ordusunun ilk elit xüsusi qüvvələr bölməsinin məzuniyyətindədir. The Defense Post-a istinadən, logonun göründüyü digər foto isə 4 aprel 2013 tarixində çəkilib və bir Əfqanıstan Milli Ordusunun xüsusi təyinatlı əsgərinin Helmand əyalətində, potensiyal Əfqan Yerli Polis namizədi ilə söhbətini göstərir. Digər foto isə Stripes tərəfindən yayınlanan xəbərdə istifadə edilib.
Bundan əlavə, iddiadakı video daha əvvəl Səudiyyə Ərəbistanından olduğu iddiası ilə də paylaşılmışdı, lakin iddianın doğru olmadığını fakt yoxlama qurumu No Rumors da bildirmişdi.
Nəticə etibarilə videonun Qarabağdan olduğu iddiası doğru deyil. İddia yanlış məlumatın yeddi növündən biri olan xətalı əlaqələndirməyə örnəkdir.
