Sentyabr ayının əvvələrindən etibarən Azərbaycan və İran arasında yaşanan gərginlik və İranın Azərbaycanla sərhəddə "Xeybər fatehləri" adlı hərbi təlimləri başlatdığı gündən bəri sosial mediada və xəbər saytlarında bir çox iddialar paylaşılıb. 23 sentyabr tarixində bəzi xəbər saytlarında paylaşılan xəbərlərdə, İran İslam Respublikasının Silahlı Qüvvələrinin Baş Qərargah Rəisi Məhəmməd Baqirinin, “Azərbaycana 4000 raket atılacaq və Bakı məhv ediləcək” deyərək açıqlama verdiyi iddia olunub.
Armenpress-də belə bir xəbərə rastlanmır
İddia mətnində, Armenpress adlı xəbər sayt mənbə göstərilib. Açar sözlərdən istifadə edərək Armenpress saytı üzrə Google-da axtarış etdikdə, belə bir açıqlama xəbərinə rastlanmır. Armenpress veb saytı üzrə İran və Azərbaycan haqqında paylaşılan xəbərləri araşdırdıqda da Məhəmməd Baqirinin belə bir açıqlaması olmadığını görürük.
Ermənicə bənzər açar sözlərdən istifadə edərək Google-da digər nəticələrə nəzər yetirdikdə də belə bir açıqlamaya dair xəbərə rastlanmır.
Məhəmməd Baqirinin nə Twitter hesabında nə də farsca xəbərlərdə belə açıqlama yoxdur
Məhəmməd Baqirinin sosial media hesablarına dair axtarış etdikdə “baqeri_ir” istifadəçi adına sahib bir profilə rast gəlmək mümkündür. Həmin hesabdan edilən sonuncu paylaşım 19 oktyabr 2021-ci il tarixinə aiddir iddia edilən cümlələr yoxdur.
İran İslam Respublikasının Müdafiə Nazirliyinin rəsmi veb saytında açıqlamalar qisminə nəzər yetirdikdə də iddia cümləsinə rast gəlmək mümkün deyil.
Fars dilində xəbər yayımı edən Mehr News, BBC İran kimi bir çox xəbər saytlarında İran və Azərbaycan münasibətləri, Məhəmməd Baqiri haqqında xəbərlərə nəzər yetirdikdə iddia edilən açıqlamanın mövcud olmadığını görürük.
4000 raket və İrana dair açar sözlərlə axtarış etdikdə, İsraiə hücumlardan bəhs edən 2021-ci ilin may və sentyabr ayına aid xəbərlərə rast gəlirik. Əlaqədar xəbərlərdə isə İsrailə qarşı edilmiş 4 minin üzərində raket hücumlarının İran ilə əlaqaləndirildiyini görürük. Bu rəqəm, 2021-ci ilin sentyabr ayında Azərbaycan və İran arasında meydana gələn gərginlik ilə əlaqələndirilmiş ola bilər. Lakin iranlı generalın Azərbaycan haqqında belə bir açıqlaması mövcud deyil.
