Sosial şəbəkədə paylaşılan bir fotoda Yaponiyada sürüşmə nəticəsində dağılan yolun bir neçə saat ərzində düzəldiyi iddia edildi.
Yolun tikilməsi hadisədən dörd ay sonra başa çatıb
Yaponiyadan olduğu iddia edilən fotonu internetdə araşdırdıqda 2018-ci ilin iyul ayında güclü yağışlar nəticəsində Fukui əyalətindəki yolun yararsız hala düşdüyünə dair xəbərlər görürük. Əyalətin rəsmi saytında da yolun tikintisinə dair fayl da tapmaq mümkündür. Əyalətin rəsmi internet saytında mətbuat ilə paylaşılan sənəddə yolun 4 milyon yen dəyərində olduğu, 31 oktyabr 2018 tarixində yəni hadisədən dörd ay sonra istifadəyə açıldığı bildirilib.
Yolun tikintisinə dair sənədin Google Translate ilə çevrilmiş halı
Həmin dövrdə Yaponiyanın xəbər qurumları tərəfindən 2018-ci ilin oktyabr ayının sonunda paylaşılan məlumatda da yolun tikintisinin dörd ay sonra başa çatdığı bildirilib.
Eləcə də bələdiyyə rəsmisinin yerli mətbuata verdiyi reportajda yolun niyə U şəklində tikildiyini izah edərkən, bərpa işlərinin 28 avqust 2018 tarixində başladığını və oktyabr ayının sonunda istifadəyə açıldığını vurğulayıb.
Bundan əlavə hadisədən bir ay sonra 3 avqust 2018 tarixində paylaşılan videodan da yolun tikintisinin hələ də başlamadığı görünür.
Yaponiyanın Fukuoka şəhərində 2016-cı ildə çökən başqa bir yolun isə 48 saat ərzində bərpa edildiyi məlumatına həmin dövr paylaşılan xəbərlərdən görmək mümkündür.
Yaponiyadakı yolun fotosu internetdə başqa dillərdə də saatlar ərzində tikildiyi iddiası paylaşılıb və fakt yoxlama qurumları tərəfindən iddianın yanlış olduğu ortaya qoyulub.
