Sosial mediada paylaşılan bir fotodakı şəxsin ABŞ-da yaşayan bir şəxsin maliyyə qurumundan 50 milyon dollar oğurlayaraq kasıb insanlara verdiyi üçün həbs olunduğu iddia edildi.
Fotodakı şəxs 50 mindən çox kompüterə hücum edib
İddia fotosunun real hekayəsini tapmaq üçün axtarış motorlarında şəkli əks axtarış üsulu ilə araşdırdıqda qarşımıza rus və ingilis dillərində xəbərlər çıxır. Buradan həmin şəxsin adının Peter Levashov olduğu məlumatını da əldə edirik. Fərqli xəbər saytlarında verilən məlumata əsasən Levashov, ABŞ-dakı bank hesablarına və kompüterlərə zərərli proqramlar ilə məqsədli hücumlar təşkil edib.
Rəsmi qurumların açıqlamalarını tapmaq üçün axtarış motorunda açar sözlərlə araşdırdıqda ABŞ Ədalət Departamentinin rəsmi saytındakı açıqlamaları tapırıq. Buradakı məlumata əsasən 2017-ci ildə İspanyada həbs olunan və ABŞ-a təhvil verilən Levashov, 2018-ci ildə öz cinayət əməllərini etiraf edib. 2019-cu ildə isə 4 il həbs cəzasına məhkum edilən şəxs 2020-ci ilin yanvar ayında elektron təqib ilə şərti azadlığa buraxılıb. Sonuncu məhkəməsi 20 iyul 2021-ci ildə olan Levashov, həbsxanada olmasa da 3 il müddətində nəzarət altında olacaq. Məhkəmənin qərar əmrindəki məlumata əsasən Levashov, əsaslı kimlik oğurluğu, qorunan kompüterlərə qəsdən zərər vermə, elektron saxtakarlıq və konspirasiya cinayətlərindən məhkum edilib.
ABŞ Ədalət Departamantinin paylaşdığı məhkəmə qərarı
İddianın əksinə fotodakı şəxs kompüterlərə virus yoluxduran, insanların kimlik məlumatları, hesab bilgiləri, bank hesabları kimi məlumatları oğurlamaq, maliyyə bazarında saxtakarlıq əməlləri (pump and dump) etmək üçün zərərli proqramlar işlədib. AP-nin xəbərinə görə prokuror bu zərərli proqramlardan birinin təkcə bir gündə 57 milyon spam e-poçt mesajı, başqa bir proqramın 1.5 milyard spam mesajlar, digərinin isə gündə 4 milyon spam mesaj yollamaq gücünə malik olduğunu bildirib.
